Тропари и кондаки Апостолам
Преставление святого Апостола
и евангелиста Иоанна Богослова
26сентября/9октября
Тропарь, глас 2-й
Апостоле, Христу Богу возлюбленне, ускори избавити люди безответны, приемлет тя припадающа Иже падша на перси приемый, Егоже моли, Богослове, и належащую мглу языков разгнати, прося нам мира и велия милости.
Кондак, глас 2-й
Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов.
Святых первоверховных апостолов
Петра и Павла
29июня/12июля
Тропарь, глас 4-й
Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость.
Кондак, глас 2-й
Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси, паче всякаго всеплодия, Едине сведый сердечная.
Величание
Величаем вас, апостоли Христовы Петре и Павле, весь мир ученьми своими просветившия, и вся концы ко Христу приведшия.
Тропарь апостола Иакова
23октября/5ноября
глас 2
Яко Господень ученик восприял еси, праведне, Евангелие,/ яко мученик имаши еже неописанное,/ дерзновение яко брат Божий,/ еже молитися яко иерарх:// моли Христа Бога спастися душам нашим.
Тропарь апостолу Андрею Первозванному
30/ноября/13декабря
глас 4
Яко апостолов первозванный/ и верховнаго сущий брат,/ Владыце всех, Андрее, молися,/ мир вселенней даровати// и душам нашим велию милость.
Тропарь апостолу и евангелисту Луке
18 октября/22апреля
Тропарь, глас 5
Апостольских деяний сказателя и Евангелия Христова светла описателя, Луку препетаго, славна суща Христове Церкви, песньми священными святаго апостола похвалим, яко врача суща, человеческие немощи, естества недуги и язи душ исцеляюща и молящася непрестанно за души наша.
Кондак, глас 2
Истиннаго благочестия проповедника и тайн неизреченных ритора, звезду церковную, Луку Божественнаго восхвалим: Слово бо его избра, с Павлом мудрым языков учителя, Един ведый сердечная.
Тропарь апостолу Филиппу
14/27 ноября
Тропарь, глас 3
Благоукрашается вселенная, Ефиопия ликовствует, яко венцем красуема, тобою просветившися, светло торжествует память твою, Богоглаголиве Филиппе, вся бо веровати Христу научил еси и течение совершил достойно Евангелия. Тем дерзновенно варит Ефиопская рука к Богу, Егоже моли даровати нам велию милость.
Тропарь апостолу Фоме
Кондак, глас 4
Премудрости благодати исполнен, Христов апостол и служитель истинный, в покаянии вопияше Тебе: Ты мой еси Бог же и Господь.
