Тропари и кондаки мученикам и страстотерпцам
Память великомученика Георгия Победоносца
23 апреля/6 мая
Тропарь, глас 4
Яко пленных свободитель и нищих защититель, немощствующих врач, Победоносче великомучениче Георгие, моли Христа Бога, спастися душам нашим.
Кондак, глас 4
Возделан от Бога показался еси благочестия делатель честнейший, добродетелей рукояти собрав себе, сеяв бо в слезах, веселием жнеши, страдальчествовав же кровию, Христа приял еси, и молитвами, святе, твоими всем подаеши прегрешений прощение.
Тропарь священномученику Киприану и мученице Иустине
Тропарь, глас 4
И нравом причастник, / и престолом наместник апостолом быв, / деяние обрел еси, Богодухновенне, / в видения восход: / сего ради, слово истины исправляя, / и веры ради пострадал еси даже до крове, / священномучениче Киприане, / моли Христа Бога / спастися душам нашим.
Тропарь мученику Трифону
Тропарь, глас 4
Мученик Твой, Господи, Трифон, / во страдании своем венец прият нетленный от Тебе, Бога нашего: / имеяй бо крепость Твою, / мучителей низложи, / сокруши и демонов немощныя дерзости. / Того молитвами / спаси души наша.
Великомученику и Целителю Пантелеимону
Тропарь, глас 3
Страстотерпче святый и целебниче Пантелеимоне, / моли милостиваго Бога, / да прегрешений оставление / подаст душам нашим.
Тропарь Собора новомучеников и исповедников Церкви Русской
глас 4
Днесь радостно ликует Церковь Русская,/ прославляющи новомученики и исповедники своя:/ святители и иереи,/ царственныя страстотерпцы,/ благоверныя князи и княгини,/ преподобныя мужи и жены/ и вся православныя христианы,/ во дни гонения безбожнаго/ жизнь свою за веру во Христа положившия/ и кровьми истину соблюдшия./ Тех предстательством, долготерпеливе Господи,/ страну нашу в Православии сохрани// до скончания века.
Тропарь мученику Диомиду врачу
глас 3
Мучительнии сосуди устроиша ти путь к Небесем, Христов воине Диомиде, победив диавольския козни, и на Небесех у Христа прославився, молися за творящих верою память твою
Тропарь великомученику Артемию
Тропарь, глас 4
Истинною бо Христовою верою утверждься, страстотерпче, мучителя злочестива царя победил еси со идольским того возношением. Тем от Царя Великаго, вечно царствующаго, пресветлым венцем победным одарен бысть, вся исцеляяй болящия и призывающия тя, Артемие великий, моли Христа Бога спасти души наша.
Кондак, глас 2
Благочестиваго и венценоснаго мученика, на враги победы вземшаго одоление, сошедшеся, достойно песньми восхвалим Артемия превеликаго в мученицех, чудес же дателя пребогатаго, молится бо Господу о всех нас.
Тропарь мученика Неофита
глас 4
Мученик Твой, Господи, Неофит во страдании своем венец прият нетленный от Тебе, Бога нашего, имеяй бо крепость Твою, мучителей низложи,сокруши и демонов немощныя дерзости. Того молитвами спаси души наша.