Тропари иконам Пресвятой Богородицы
Празднование Казанской иконе Божией Матери
22 октября/4 ноября, также 8/21 июля
Тропарь, глас 4-й
Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех, и в болезнех, обремененных грехи многими, предстоящих и молящихся Тебе умиленною душею, и сокрушенным сердцем, пред пречистым Твоим образом со слезами, и невозвратно надежду имущих на Тя избавления всех зол, всем полезная даруй, и вся спаси, Богородице Дево: Ты бо еси Божественный покров рабом Твоим.
Кондак, глас 8-й
Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы. Ускорим на молитву, и потщимся на покаяние: источает бо нам неоскудныя милости Пречистая Богородица, предваряет на помощь, и избавляет от великих бед и зол, благонравныя и богобоящияся рабы Своя.
Величание
Достойно есть величати Тя, Богородице, честнейшую Херувим, и славнейшую без сравнения Серафим.
Иконы Божией Матери «Знамение»
27 ноября/10 декабря
Тропарь, глас 4-й
Яко необоримую стену и источник чудес стяжавше Тя, раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.
Сретение Владимирской иконы Божией Матери
21 мая/3 июня
(Тропарь этот также поется 23 июня и 26 августа)
Тропарь, глас 4-й
Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе взываем сице: о пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша яко милосерд.
Явление Тихвинской иконы Божией Матери
26 мая/8 июня
Тропарь, глас 4-й
Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприемши, прославляет Тя Богомати всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему Пречистому образу, Дево неискусобрачная.
Тропарь Пресвятой Богородице Пред Иконой Ее «Всецарица»
18/31августа
Тропарь, глас 4
Образом радостотворным честныя Всецарицы, / желанием теплым взыскающих благодати Твоея, спаси, Владычице; / избави от обстояний к Тебе прибегающих, / от всякия напасти огради стадо Твое, / к заступлению Твоему взывающее присно.
Тропарь Пресвятой Богородице Пред Иконой Ее «Скоропослушница»
9/22ноября
Тропарь, глас 4
К Богородице притецем, сущии в бедах, / и святей иконе Ея ныне припадем, / с верою зовуще из глубины души: / скоро наше услыши моление, Дево, / яко Скоропослушница нарекшаяся. / Тебе бо раби Твои в нуждах / готовую Помощницу имамы.
Тропарь Пресвятой Богородице Пред Иконой Ее «Спорительница Хлебов»
15/28октября
Тропарь, глас 3
О, Пречистая Дево Марие, / Мати Царя небесе и земли, / благоутробно призираеши на любящих Сына Твоего, / Христа Бога нашего, / и труждающихся во имя Его / вечнаго ради спасения, / и подаеши им вся обильно к наслаждению, / Спорительнице сущи хлебов им, / избавляя их всякия нужды и утеснения / и устрояя им, рабом Твоим сущим, / избавление вечныя муки и жизнь вечную.
Тропарь Пресвятой Богородице Пред Иконой Ее «Троеруца»
28 июня / 11 июля; 12 июля / 25 июля
Тропарь, глас 4
Яко звезда светозаряющая, / из Сербии на Афон чудесно прииде / всечестная икона Твоя Троеручица, / юже обитель Хиландарская благоговейно восприемши, / яко Божественный дар свыше, / прославляет Тя, Владычицу, / и умильно вопиет: / не остави милость Твою от нас, / но пребуди с нами во веки.
Тропарь Пресвятой Богородице Пред Иконой Ее «Умиление»
28июля/10 августа
Тропарь, глас 4
К Богородице со умилением припадем, / вси, грехми обремененнии, / чудотворную Ея икону Умиления облобызающе / и вопиюще со слезами: / Владычице, приими моление недостойных раб Твоих / и подаждь нам, просящим, / велию Твою милость.
Тропарь Пресвятой Богородице Пред Иконой Ее «Утоли Моя Печали»
25 января / 7 февраля
Тропарь, глас 5
Утоли болезни / многовоздыхающия души моея, / утолившая всяку слезу от лица земли, / Ты бо человеком болезни отгониши / и грешных скорби разрушаеши, / Тебе бо вси стяжахом надежду и утверждение, / Пресвятая Мати Дево.
Тропарь Пресвятой Богородице Пред Иконой Ее «Феодоровской»
14 / 27 марта; 16 / 29 августа
Тропарь, глас 4
Пришествием честныя Твоея иконы, Богоотроковице, / обрадованный днесь Богохранимый град Кострома, / якоже древний Израиль к кивоту Завета, / притекает ко изображению лица Твоего / и воплотившагося от Тебе Бога нашего, / да Твоим Матерним к Нему предстательством / присно ходатайствуеши всем, / под сень крова Твоего прибегающим, / мир и велию милость.
Тропарь Иной Пресвятой Богородице Пред Иконой Ее «Феодоровской»
14 / 27 марта; 16 / 29 августа
Тропарь, глас 4
Днесь светло красуется преименитый град Кострома / и вся Русская страна, / созывающи к веселию вся боголюбивыя народы христианския, / на преславное торжество Божия Матере, / пришествия ради чудотворнаго Ея и многоцелебнаго образа, / днесь бо явися нам пресветлое великое солнце, / приидите, вси Богоизбраннии людие, новый Израиль, / ко источнику цельбоносному, / источает бо нам неоскудныя милости Пресвятая Богородица / и избавляет вся грады и страны христианския / невредимы от всех навет вражиих. / Но, о Всемилостивая Госпоже, Дево Богородице, Владычице, / спаси страну нашу, и архиереи, и вся люди Твоего достояния от всех бед / по велицей Твоей милости, да зовем Ти: / радуйся, Дево, христианом похвало.
Тропарь иной, глас 4
Пришествием честныя Твоея иконы, Богоотроковице, / обрадованный днесь Богохранимый град Кострома, / якоже древний Израиль к кивоту Завета, / притекает ко изображению лица Твоего / и воплотившагося от Тебе Бога нашего, / да Твоим Матерним к Нему предстательством / присно ходатайствуеши всем, / под сень крова Твоего прибегающим, / мир и велию милость.